Իտալիոյ հայոց հոգեւոր հովիւ՝ Տ․ Տիրայր Վրդ․ Յակոբեանի գլխաւորութեամբ Միլանի Սբ․ Քառասուն մանկանց ծխական համայնքի երիտասարդները ուխտագնացութիւն կատարեցին դէպի hիւսիսային Իտալիոյ Լուինո համայնքը։ Յունիսի 19-ի շաբաթ առաւօտեան քաղաքի երկաթուղային կայարանի մէջ անոնց դիմաւորեցին Քաղաքային խորհուրդի նախագահ՝ Ֆապրիցիո Լուլլիոն եւ Լուինոյի եկեղեցական խորհուրդի միջեկեղեցական յանձնաժողովի աշխարհիկ ներկայացուցիչ՝ Ալեսանդրո Ֆրանցետին:

Հայ ուխտաւորները այցելեցին եւ աղօթեցին Madonna del Carmine սրբավայրի մէջ, ուր անոնց դիմաւորեց Լուինոյի եկեղեցական խորհուրդի առաջնորդ Տոն Սերճո Ձամբենետին: Այնուհետեւ ուղեւորուեցան դէպի Սբ․ Պետրոս եւ Պօղոս ծխական եկեղեցի։ Ծխական տան մէջ կազմակերպուած հայկական ուտեստներով հարուստ ճաշէն ետք, հայ երիտասարդները մասնակցեցան միջեկեղեցական աղօթքին։

Օրուան երկրորդ կիսուն նախատեսուած Տանթէ Ալիգիերիին նուիրուած ցուցահանդէսը այցելելէն առաջ, անոնց ողջոյնի խօսքով դիմաւորեց  Լուինոյի քաղաքապետ Էնրիկո Պեանկին:

Տ․ Տիրայր Վրդ․ Յակոբեան բոլորի անունով շնորհակալութիւն յայտնեց քաղաքի ղեկավարութեան հիւրընկալ ընդունելութեան համար։ Տպաւորութիւններով յագեցած օրը աւարտեցաւ քաղաքի տեսարժան վայրերու եւ լողափի այցելութեամբ։