Արեւմտեան Եւրոպայի հայրապետական պատուիրակ եւ Ս. Աթոռի մօտ Հայաստանեայց Առաքելական Եկեղեցւոյ մշտական ներկայացուցիչ Գերշ. Տ. Խաժակ Ս. Արք. Պարսամեան երէկ Հռոմի մէջ մասնակցեցաւ Հայ Կաթողիկէ Եկեղեցւոյ նորընտիր կաթողիկոս-պատրիարք Ռաֆայէլ-Պետրոս ԻԱ.-ի անդրանիկ Ս. Պատարագին։ Լեւոնեան քահանայապետական հայկական վարժարանի համալիրի մատրան երդիքին տակ տեղի ունեցաւ արարողութիւնը, որուն ներկայ գտնուեցան նաեւ Ս. Աթոռի մօտ Հայաստանի Հանրապետութեան դեսպան Կարէն Նազարեան, Անարատ Յղութեան հայ քոյրերու միաբանութեան մեծաւոր մայր Արուսեակ Սաճոյեան, Հայ Կաթողիկէ նուիրապետութենէն բարձրաստիճան ներկայացուցիչներ եւ հաւատացեալներ։ Նորընտիր կաթողիկոս-պատրիարքի մատուցած գոհաբանական Ս. Պատարագը, միեւնոյն ժամանակ, նուիրուած էր Հայաստանի Հանրապետութեան անկախութեան 30-ամեակին։

Կրօնական արարողութիւններէն վերջ սարքուեցաւ ընդունելութիւն մը՝ ի պատիւ նորընտիր կաթողիկոս-պատրիարքին, որ ընդունեց շնորհաւորութիւնները։

Այս ընդունելութենէն վերջ Լեւոնեան վարժարանի սեղանատան մէջ սիրոյ սեղան մըն ալ սարքուեցաւ՝ հոգեւորականաց դասու եւ Կարէն-Նանա Նազարեան ամոլի մասնակցութեամբ։ Գերշ. Տ. Խաժակ Ս. Արք. Պարսամեան ճաշի ընթացքին ունեցաւ հակիրճ ելոյթ մը, որու ընթացքին ուրախութիւն յայտնեց Ս. Պատարագի ընթացքին աղօթակից ըլլալու բերումով։ Նորին սրբազնութիւնը մաղթեց, որ Բարձրեալ Տէրը առաւել զօրացնէ նորընտիր Ռաֆայէլ-Պետրոս ԻԱ. Պատրիարքը նոր կոչման մէջ եւ յաջողութեամբ պսակէ իր բոլոր բարի նպատակները՝ յանուն հայ ժողովուրդին եւ Քրիստոսի եկեղեցւոյ։

Դեսպան Կարէն Նազարեանն ալ հանդէս եկաւ շնորհաւորութեան խօսքով մը, որմէ վերջ ամենապատիւ եւ գերերջանիկ պատրիարքի փակման խօսքով աւարտին հասաւ սիրոյ սեղանը։