Հունիսի 9-ի երեկոյան Գերշ․ Տ․ Խաժակ Արք․ Պարսամյանը ՝ մասնակցեց Ստամբուլում կայացած Սևծովյան տնտեսական համագործակցության կազմակերպության (ՍԾՏՀ) 30-ամյակին և այդ միջազգային կառույցին Հայաստանի Հանրապետության 20-ամյա անդամակցությանը նվիրված միջոցառմանը:

Հոբելյանական երեկոն, որին Սրբազան Հայրը հրավիրված էր կազմակերպության ՀՀ մշտական ներկայացուցիչ տիար Սահակ Սարգսյանի կողմից, տեղի ունեցավ Ստամբուլի Ջեմալ Ռեսիթ Ռեյ համերգասրահում։ Պաշտոնական ելույթներին և հուշանվերների հանձման արարողությանը հետևեց Հայաստանից ժամանած Կոմիտաս Ազգային քառյակի համերգը։

Ներկաների շարքում էին Ն․Ա․Ս․ Սահակ Բ Պոլսո Պատրիարքը, Պատրիարքության հոգևորականներ, Թուրքիայի Հայ Կաթոլիկ համայնքի առաջնորդ Տ․ Լևոն Արք․ Զեքիյանը, Թուրքիայի Արտաքին գործերի նախարարության Ստամբուլի ներկայացուցիչը, Սևծովյան տնտեսական համագործակցության գլխավոր քարտուղար Լազար Կոմանեսկուն, դեսպաններ, դեսպանությունների աշխատակազմի անդամներ, ինչպես նաև հայ համայնքային կառույցների ղեկավարներ ու թուրքահայ հասարակայնության ներկայացուցիչներ։