Սրբազան Հայրը, որպես Հայ Առաքելական Եկեղեցու ներկայացուցիչ Վատիկանում և միջեկեղեցական հարաբերությունների բազմամյա փորձառություն ունեցող հոգևորական, հրավիրվել էր մասնակցելու «Ֆոկոլարի» շարժման նախաձեռնած էկումենիկ համաժողովին, որը կայացավ մարտի 26-ից 29-ը Կաստել Գանդոլֆոյում (Իտալիա)՝ Կաթոլիկ Եկեղեցու հոբելյանական տարվա շրջանակում։

«Ֆոկոլարի» շարժումը միջազգային կազմակերպություն է, որը հիմնադրվել է Կիարա Լուբիչի կողմից 1943 թվականին։ Այն նպատակ ունի խթանելու ժողովուրդների և քրիստոնեական համայնքների միասնությունն ու եղբայրությունը՝ միջեկեղեցական և միջկրոնական երկխոսության միջոցով։

Սրբազան Հայրը ելույթ ունեցավ մարտի 28-ին՝ մասնակցելով «Ժողովականություն (սինոդականություն) և էկումենիզմ» թեմայով քննարկմանը։

Իր խոսքում Սրբազան Հայրը կիսվեց Կաթոլիկ Եկեղեցու Եպիսկոպոսների Սինոդի երկու նստաշրջաններին (Վատիկան՝ հոկտեմբեր, 2023 և 2024) մասնակցելու իր փորձառությամբ՝ ընդգծելով քրիստոնյաների միասնության արժեքը. «Ես ինձ իսկապես ընդունված զգացի հավատավոր եղբայրների և քույրերի մեծ ընտանիքում։ Սա խորապես հարստացնող փորձառություն էր, քանի որ համախմբել էր անձանց, որոնք, թեև ներկայացնում էին տարբեր իրականություններ և տեսակետներ, միավորված էին ընդհանուր հավատքով»։

Հիշեցնենք, որ Սրբազան Հայրը մաս էր կազմում այն փոքրաթիվ տարբեր քրիստոնեական եկեղեցիների ներկայացուցիչներին, որոնք հրավիրվել էին մասնակցելու Կաթոլիկ Եկեղեցու Սինոդին։

Իր ելույթում Սրբազան Հայրը նաև կարևորեց փոխադարձ հարգանքի ներքո երկխոսության դերը Սինոդի շրջանակում՝ ընդգծելով Ֆրանկիսկոս Պապի նշանակալի ներկայությունն ու ներգրավվածությունը, ինչը ևս մեկ անգամ վկայեց սինոդալ ճանապարհի կարևորության մասին։

Պատասխանելով Սինոդի էկումենիկ նշանակության և նրա հեռանկարների վերաբերյալ հարցին՝ Սրբազան Հայրը նշեց.

«Էկումենիկ սկզբունքների կարևորությունը հստակորեն արտահայտված է սինոդական եզրափակիչ փաստաթղթում։ Այն ներառում է մասնակիցների բազմազան ներդրումներն՝ խթանելով քրիստոնեական միասնության ավելի խորը ըմբռնումը։ Այն ընդգծում է հոգևոր էկումենիզմի գաղափարը, որը գերազանցում է զուտ ինստիտուցիոնալ համագործակցությունը՝ կենտրոնանալով համատեղ հավատքի և աղոթքի փորձառությունների վրա։ «Արյան էկումենիզմի» հայեցակարգը, որը վերաբերում է քրիստոնյաների համատեղ տառապանքներին և զոհողություններին, ընդգծում է արդարության և հալածանքների դեմ միասնական պայքարը՝ կոչ անելով համերաշխության և միասնության»։

Ապագային նայելով՝ նա ընդգծեց, որ Սինոդը հիմք է դրել ավելի ներառական ու համագործակցային երկխոսության համար՝ բացելով նոր հնարավորություններ սոցիալական արդարության և համամարդկային մարտահրավերների համատեղ հաղթահարման գործում.

«Այս Սինոդի կարևորությունը կայանում է նրա ուժեղ էկումենիկ բնույթի մեջ, որը խթանում է փոխըմբռնումն ու հարգանքը քրիստոնյաների միջև՝ սնուցելով ապագա սերունդների համագործակցության և միասնության տեսլականը»։